Nxitja e punësimit, në fokus punësimi i grave dhe vajzave në nevojë

"Programi i Nxitjes së Punësimit të punëkërkuesve të papunë, femra", i cili zgjatë tre vjet (2007-2009), edhe këtë vit për gratë dhe vajzat e kategorisë në nevojë, parashikon mbështetjen me paga në nivelin e pagesës minimale, duke filluar me katër paga mujore në vitin e parë dhe me tetë paga në vitin e tretë, kohë kur do të përfundojë projekti. I konsideruar si më prioritari i katër programeve që po mbështetet financiarisht nga Ministria e Punës, Çështjeve Sociale dhe Shanseve të Barabarta, ky program deri tani ka mundësuar punësimin e 400 grave dhe vajzave në nevojë, sipas Sektorit të Nxitjes së Punësimit, pranë Zyrës Rajonale të Punësimit (ZRP) Tiranë. Punësimi i grave dhe vajzave, pjesëmarrëse në këtë program, është kryer në pesë subjekte private, të cilat e ushtrojnë aktivitetin prodhues në këpucari (ku janë punësuar rreth 260 gra dhe vajza) dhe rrobaqepësi (ku janë punësuar rreth 140 të tjera). Programi, që do të zgjasë tre vjet, po mbështetet me 50 përqind të fondit të përgjithshëm të programit të punësimit, prej 120 milionë lekë. Ministria e Punës, Çështjeve Sociale dhe Shanseve të Barabarta po realizon këtë program duke mbështetur bizneset punëdhënëse me anën e subvencionimit, në përqindje të kostove për sigurimet e detyrueshme, të pagës dhe kreditimin për pajisjen e vendit të punës. Programet që po mbështeten financiarisht nga Ministria janë "Programi i nxitjes së punësimit të punëkërkuesve të papunë", "Programi i nxitjes së punësimit nëpërmjet formimit në punë", "Programi i nxitjes së punësimit nëpërmjet mbështetjes së formimit institucional" dhe "Programi i nxitjes së punësimit të punëkërkuesve të papunë femra".

Shkodër: Gjobitet firma për punime të dobta në rikonstruksionin e rrugës

Ankesave të qytetarëve në lidhje me cilësinë e dobët të ndërtimit të rrugës "Nazmi Kryeziu" në qytetin e Shkodrës, Bashkia e qytetit të Shkodrës iu është përgjigjur, duke ndëshkuar konform ligjit, drejtuesit e firmës së ndërtimit, "Karl Gega" që ka realizuar punimet në këtë rrugë. Kryetari i bashkisë së Shkodrës Lorenc Luka, tha të shtunën për ATSH-në, se është ngritur një grup pune në përbërje të të cilit janë specialistë të departamentit të shërbimeve, të ndërmarrjes Ujësjellës-Kanalizime, mbikqyrëses së punimeve, si dhe kolaudatorë të punimeve në këtë rrugë, të cilët nga verifikimi i bërë në vend, arritën në përfundimin se rrjeti ekzistues i kanaleve të ujrave të zeza është dëmtuar duke pasur shembje, dëmtim dhe bllokim me materiale inerte të pusetave ekzistuese, duke lënë gjithë rrjetin jashtë funksionit. Bazuar në konstatimet e defekteve në këtë aks rrugor nga ana e bashkisë është vendosur, që të gjitha riparimet dhe vënien në eficensë të rrjetit inxhinierik të merren përsipër nga ndërrmarrja e Ujësjellës-Kanalizimeve në Shkodër. Vlera e dëmit financiar të konstatuar është 318.360 lekë dhe do të zhdëmtohet nga firma që ka pasur për detyrë të bëjë rikonstruksionin e kësaj rruge.

Rritja e prodhimit vendas ka ulur çmimet e produkteve bujqësore

Në tregjet bujqësore të vendit gjatë javës së fundit, çmimet e produkteve shënuan një ulje të ndjeshme. Ministria e Bujqësisë, Ushqimit dhe Mbrojtjes së Konsumatorit në raportin periodik të saj mbi tregjet, duke analizuar të dhënat statistikore, vëren se më shumë se 80 përqind e nevojave për perime dhe produkte të tjera bujqësore, plotësohen nga fermerët shqiptarë, madje edhe me çmime më të ulëta. Sipas MBUMK, për vitin 2007, konsumi i ushqimeve në vendin tonë shënoi raportin 500 milionë USD ushqime nga importi dhe 400 milionë USD të prodhuara në vend dhe gjatë vitit 2008, ku raport pritet të ngushtohet përsëri, për shkak të rritjes së prodhimit vendas, veçanërisht të grurit, perimeve, frutave dhe produkteve të përpunuara agroindustriale.