Presidenti tha se Prishtina është e gatshme të bisedojë me Beogradin vetëm për çështje praktike

Sejdiu: Me Serbinë nuk do të ketë më asnjëherë bisedime për statusin

Presidenti i Kosovës, Fatmir Sejdiu, hodhi poshtë çdo mundësi për të rihapur bisedime për statusin tashmë të zgjidhur të Kosovës apo ndryshimin e propozimit të presidentit Martti Ahtisaari. Komentet e tij pasuan paralajmërimet e Sekretarit të Përgjithshëm të Kombeve të Bashkuara, Ban Ki-Moon, për një seri bisedimesh ndërmjet Prishtinës dhe Beogradit për zgjidhjen e, siç është thënë, çështjeve të interesit të përbashkët, e që përfshijnë disa fusha si sundimin e ligjit, mbrojtjen e trashëgimisë kulturore, doganave e transporteve.

Presidenti Sejdiu tha të premten se Prishtina është e gatshme të bisedojë me Beogradin vetëm për çështje praktike që kanë të bëjnë me integrimin e një pjese të qytetarëve serbë në veri të Kosovës që mëdyshen të jenë pjesë e jetës së përditshme dhe e jetës institucionale në Kosovë. "Asnjëherë s'do të hapet pakoja e Ahtisaarit, asnjëherë s'do të hapet statusi i Kosovës, asnjëherë nuk do të ulemi në tavolinë për të dialoguar çështjet që kanë të bëjnë me të ardhmen e Kosovës dhe të pozicionit të saj juridik - kushtetues që ka".

Presidenti Sejdiu, pas një takimi që zhvilloi me pjesëtarë të komuniteteve pakicë në Kosovë, paralajmëroi se së shpejti do të ngritet Këshilli Konsultativ për Komunitetet që parashihet edhe me kushtetutën e Kosovës. Sipas tij, edhe vetë formimi i këtij këshilli është pjesë e detyrimeve që duhet të përmbushin institucionet e vendit. "Çështjet praktike janë ato që kemi thënë të cilat ne jemi zotuar se do t'i respektojnë në mënyrën më të mirë të mundshme dhe ne nuk heqim dorë nga ajo që kemi thënë. Edhe kjo pjesë e punës së sotme është ajo. Ne do të formojmë një këshill konsultativ që është në interes edhe të integrimit, edhe të relaksit por edhe të funksionimit të mirë për interesat e komuniteteve pakicë", tha presidenti Sejdiu.

Beogradi ndërkaq ka kërkuar rihapjen e bisedimeve për statusin e Kosovës duke kundërshtuar ashpër shpalljen e pavarësisë dhe hyrjen në fuqi të Kushtetutës së saj. Si kundërpërgjigje, përfaqësuesit politikë, kryesisht të serbëve që jetojnë në veriun e Kosovës të përkrahur nga Beogradi, kanë paralajmëruar për nesër formimin e të ashtuquajturit Parlament i bashkësive të komunave të Kosovës. Autoritetet vendase e kanë cilësuar të paligjshëm formimin e këtij parlamenti, ndërsa zyrtarë të Misionit të Kombeve të Bashkuara thanë se ai parlament nuk do të ketë asnjë ndikim juridik mbi Kosovën.

Presidenti Fatmir Sejdiu nuk e ka përjashtuar mundësinë e bisedimeve me Beogradin për çështje praktike që janë në interes të qytetarëve të Kosovës, por ka theksuar se në këto bisedime, Prishtina mund të hyjë vetëm si palë e barabartë me Beogradin. Sejdiu ka thënë se pavarësisht tendencave të Beogradit, Qeveria e Kosovës nuk do të pranojë asnjë zgjidhje që do të jetë në dëm të qytetarëve të Kosovës. Sipas tij, çdo çështje e mundshme do të analizohet thellësisht dhe me maturi. Presidenti i Kosovës siguroi se sa i përket statusit nuk do të ketë më asnjëherë bisedime me Serbinë.

Shtetet e Bashkuara të Amerikës vlerësojnë njohjen e shtetit të ri nga dy të tretat e vendeve të BE

Di Carlo: Dinamika e njohjes së Kosovës nuk është e ngadalshme

Dinamika e njohjes së Kosovës është shumë më e madhe, krahasuar me disa shtete të tjera dhe këtë mund ta ilustroj me shtetet si Sllovenia, Kroacia apo Bangladeshi, ka thënë Rosemary Di Carlo, zëvendës-ndihmëse e sekretares amerikane të Shtetit. Shtetet e Bashkuara të Amerikës vlerësojnë se dinamika e njohjes së shtetit të Kosovës nuk është e ngadalshme siç vlerësohet nga qarqe të ndryshme, pasi krahasuar me shtetet tjera që pavarësinë e kanë shpallur menjëherë pas ndonjë konflikti të caktuar a në rrethana tjera, mund të konstatojnë se dinamika e njohjes së Kosovës është shumë më e mirë. Kështu ka deklaruar në Shkup, Rosemary Di Carlo, zëvendës-ndihmëse e sekretares amerikane të Shtetit pas takimeve që pati me drejtuesit e institucioneve më të larta të shtetit dhe liderët e partive politike. "Mund të themi se dinamika e njohjes së Kosovës është shumë më e madhe krahasuar me disa shtete tjera dhe këtë mund ta ilustroj me shtetet si Sllovenia, Kroacia apo Bangladeshi. Ne tani kemi një situatë kur dy e treta e shteteve të BE-së dhe dy e treta e shteteve anëtare të NATO-s e kanë njohur pavarësinë e Kosovës. Tetë nga 15 shtetet anëtare të KS të OKB-së e kanë njohur Kosovën sikur edhe 7 vende nga G-8 ", tha Rosemary DiCarlo, për të shtuar: "Gjithsesi se ne dëshirojmë të shohim më shume shtete që do të njohim Kosovën dhe e dimë se ka plane që një gjë e tillë edhe të ndodhë në muajt në vijim", tha zëvendës-ndihmësja e sekretares amerikane të Shtetit.

Zonja Di Carlo ka falënderuar Maqedoninë për mbështetjen që po i jep planit të Ahtisaarit, por nuk janë dhënë detaje nëse në takimet e zhvilluara është biseduar për njohjen e shpejtë të Kosovës edhe nga Maqedonia. Ndërkohë, ministri i Jashtëm i Maqedonisë, Antonio Milloshoski, u shpreh: "Maqedonia ishte një ndër shtetet e para që ka mbështetur planin e zotit Ahtisaari në raport me statusin e Kosovës. Kjo nuk ka ndryshuar as tani, ndërsa në të ardhmen do të kemi qasje edhe më pozitive", deklaroi shefi i diplomacisë, Antonio Milloshovski. Zëvendës-ndihmësja e sekretares amerikane të Shtetit, Rosemary Di Carlo, është takuar edhe me liderët e partive politike shqiptare, Ali Ahmeti dhe Menduh Thaçi, me të cilët ka biseduar për nevojën e arritjes së kompromisit për progresin që duhet të arrihet, sikur edhe për zbatimin e Marrëveshjes së Ohrit.