Kryetarja e Kuvendit, e shoqëruar nga një grup deputetësh, inspektuan punimet në tunelet e rrugës Durrës-Kukës

Topalli: Rrëshen-Kalimash, një gjigand që konkurron me kohën

Kryetarja e Kuvendit, Jozefina Topalli, e shoqëruar nga një grup i madh deputetësh, inspektoi punimet në rrugën Rrëshen-Kalimash. "Autostrada Rrëshen-Kalimash është një gjigand që vrapon, është një kolos që na bën të ndihemi krenarë. Ky projekt është një mrekulli e inxhinierisë, e arkitekturës", u shpreh Topalli gjatë fjalës së saj, duke nënvizuar se kjo është një autostradë që askush në Shqipëri nuk e mendonte se mund të bëhej në vitin 2008. Ky projekt, tha Topalli, mund të imagjinohej vetëm në 2020-ën. "Kjo është Shqipëria e 2020-ës. Kjo është Shqipëria e sotme, është Shqipëria europiane", tha Topalli. Kryeparlamentarja, duke vizituar nga afër vëllimin kolosal të punimeve në këtë segment rrugor, tha se ky projekt, më i madhi infrastrukturor i realizuar në vend, pritet të përfundojë në vitin 2009 dhe jo vetëm do të lidhë Shqipërinë me Kosovën, rajonin dhe Europën, por do të sjëllë një zhvillim shumë të madh në ekonomi e turizëm, pasi lidh tregjet e Europës Juglindore me rrugët kryesore ndërkombëtare detare, nëpërmjet porteve shqiptare. Segmenti Rrëshen-Kalimash do të jetë pjesë e një autostrade prej 170 km. Ky segment përfshin 27 ura, ku ura më e gjatë arrin 360 metra, ndërsa ura më e lartë shkon deri 80 metra. Në të gjithë gjatësinë e segmentit të urave është gërmuar 20 milion metër kub dhe, ndërkohë që për realizimin e tyre është hedhur 120 mijë metër kub beton. Kjo rrugë merr dimensione madhështore në tunelet e Kalimashit, ku falë punës 24 orë në 24, sot është bërë e mundur hapja e 50.2 përqind e tij. Ky tunel me dy shpime paralele prej 5.5 kilometër secili, ecën me ritmin e 20 metrave shpim në ditë dhe vetëm muajin e fundit është hapur 500 metra. "Ne sot jemi këtu pikërisht në pikën e 50.2 përqind të të gjithë gjatësisë së tunelit, siç tha edhe menaxheri i tuneleve të kësaj firme, e cila ka bërë këtë projekt gjigand, këtë mrekulli të inxhinierisë. Çdo ditë, ata ecin me një ritëm prej 20 metrash shpim, që do të thotë që vetëm në muajin e fundit ata kanë ecur në 500 metra gjatësi. Duke vazhduar me këtë ritëm, ne shumë shpejt do të shohim të përfunduar gjithë pjesën veriore të tunelit, ashtu dhe pjesën jugore të tij", tha Topalli gjatë inspektimit të punimeve në tunel. Në fakt, vijoi më tej Topalli, mua më duket një gjigand që vrapon, një kolos. Ky projekt, tha ajo, është një mrekulli e inxhinierisë, e arkitekturës. "Është një autostradë në Shqipëri që ne nuk e imagjinonim që mund të bëhej në vitin 2008. Ky projekt mund të imagjinohej vetëm në 2020-ën. Kjo është Shqipëria e 2020-ës. Kjo është Shqipëria e sotme, është Shqipëria europiane, është Shqipëria e projekteve gjigande, është Shqipëria e veprave që kanë prerë malet përgjysmë, që, siç thonë banorët e kësaj zone, kanë lëvizur malet nga vendi dhe kanë bërë të mundur që shqiptarët të jenë më afër me njëri-tjetrin, që shqiptarët të jenë më afër me europianët, që tregjet e Europës Juglindore të përafrohen për një kohë shumë të shkurtër me porte, me rrugë ndërkombëtare dhe detare më të rëndësishme", nënvizoi më tej numri një i legjislativit. Topalli e cilësoi si diçka të pabesueshme që në një vit të realizohen 27 ura që kapin një gjatësi prej 14 km, që për një vit të bëhen 2 tunele me nga 5.5 kilomentra secili.

Topalli fton ata që s`e kanë vizituar rrugën, të shohin nga afër punimet

Rrëshen-Kalimash bën krenar çdo qytetar shqiptar

Kryetarja e Kuvendit, Jozefina Topalli, ftoi të gjithë ata që nuk e kanë vizituar rrugën Rrëshen-Kalimash, por mbi të gjitha ata që hedhin baltë çdo ditë mbi këtë projekt, që të shohin nga afër volumin e punimeve që po kryhen në këtë segment. Ajo theksoi se një projekt i tillë gjigand mund të realizohej vetëm nga një lidership i fortë dhe një vendimmarrje me kurajo. "Për të gjithë ata që nuk e kanë vizituar veprën që realisht bën krenar çdo qytetar të Shqipërisë, ju përsëris dhe një herë ftesën dhe për faktin se rruga që do të lidhë portet tona me Kosovën dhe me Europën Juglindore është me katër korsi. Është Shqipëria me katër korsi në të gjithë infrastrukturën e saj. Ndaj dhe unë mendoj se kjo na bën krenarë, kjo na bën europianë. Kjo është Shqipëria e 2020-ës dhe ne kemi rendur dhe kemi shkurtuar kohën tonë në të gjitha projektet tona", nënvizoi Topalli. Duke e vënë theksin sërish në madhështinë e projektit, Topalli theksoi se sërish nuk mund t`u besojë syve kur sheh një tunel të përmasave të tilla, me gjithë gjigandizmin e tij në Shqipëri. "Është vështirë të imagjinohet se si një ndër zonat më të braktisura apo më të prapambetura nga ana infrastrukurore, kthehet një ndër zonat më moderne nga pikëpamja infrastrukturore jo të Shqipërisë së sotme, po të rajonit, me një projekt të krahasueshëm me tunelet më të mëdha të Europës. Unë besoj se kjo është ndër veprat që bën të mundur të lidhë tregjet e Europës Juglindore me tregun shqiptar, për të kaluar më pas përmes rrugëve ndërkombëtare detare me Europën Perëndimore", vlerësoi më tej kryeparlamentarja. Topalli theksoi se kjo vepër ka një impakt të jashtëzakonshëm ekonomik të shërbimeve tregtare, të shkëmbimeve qytetare të gjithë kësaj zone. "Besoj se ky projekt që ka filluar vetëm prej një viti, në fakt në një kohë kaq jashtëzakonisht të shkurtër për një kolos kaq të madh, do të bëjë të mundur që Shqipëria shumë shpejt do ta shohë veten me më shumë prosperitet", vijoi ajo duke nënvizuar se në një periudhë kaq të shkurtër është arritur të bëhet kaq shumë.

Pernaska: Rrëshen-Kalimash s`mund të përbaltet nga monologu me Shqipërinë

Deputetja e Partisë Republikane, Lajla Pernaska, e cila ishte dje në vizitën e inspektimit të punimeve në segmentin rrugor Rrëshen-Kalimash, tha se një projekt i tillë nuk ka nevojë as për dialog dhe as për monolog. "Është një moment tepër i veçantë të ndodhesh në gjirin e kësaj vepre kaq gjigande dhe do të doja të theksoja që në këtë rast nuk ka asnjë lloj nevoje as për dialog, as për monolog, pasi vepra flet vetë", tha Pernaska duke iu referuar monologut të Ramës me Shqipërinë. Ndërsa deputeti tjetër i mazhorancës, Leonard Demi, e cilësoi ndërtimin e kësaj rruge si një vepër madhore që do të jetë në shërbim të të gjithë qytetarëve shqiptarë. "Kjo është një vepër madhore që do t'i shërbejë gjithë Shqipërisë dhe gjithë rajonit për vitet që do të vijnë nga çdo pikëpamje, ekonomike, shkëmbim, siguri dhe përfitimi i vendit tonë është i pakrahasueshëm", tha Demi.

Mbi 450 shqiptarë të punësuar në ndërtimin e rrugës

Një rrugë e përmasave të tilla natyrisht do dhe një përkujdesje të madhe të rregullave të sigurimit teknik. Në mes të tre rezidencave të ngritura për punëtorët turq dhe ata amerikanë, ishte e vendosur një qendër shëndetësore, e cila kishte një shërbim prej 24 orësh. Sipas mjekëve, gjithsej mund të ketë patur tre aksidente të vogla dhe ambulanca u ka shërbyer më shumë banorëve të zonës. Sipas Ismail Selak, inxhinier punimesh në segmentin Rrëshen-Kalimash, tuneli i hapur dhe vetë projekti i rrugës është më i miri në Ballkan. Ai pohoi se nuk ka patur asnjë incident me punëtorët, pasi firma aplikon ndëshkime të rënda për ata që thyejnë këto rregulla. Selak tha se aplikohen dy masa paralajmërimi për punëtorët: hera e parë që punëtori i shkel rregullat dënohet me gjobë, sipas rëndësisë teknike që ka rregulli, herën e dytë merr një karton, çka do të thotë se po e bëre dhe një herë do të përjashtohesh nga puna. Këto rregulla strikte kanë bërë që asnjë punëtor të mos dëmtohet në një projekt ku janë të angazhuar mijëra punonjës. E veçanta e punimeve është puna në 20 orë të ditës, aplikohen dy turne nga 10 orë. Kjo sipas drejtoreshës së marrëdhënieve me publikun të kompanisë "Bechtel-Enka", Iva Zagar, ka përshpejtuar punimet dhe projekti pritet të mbarojë në kohë reale. Ajo shtoi se nga zona janë punësuar me paga relativisht të larta për vendin tonë rreth 450 kryefamiljarë, çfarë ka sjell dhe zhvillimin e zonës.

Elis KUÇI

Ish-kryeministri italian Romano Prodi viziton Beratin

Ish-kryeministri italian Romano Prodi, në vizitën e tij në Shqipëri, vizitoi dje qytetin e Beratit. Paraditen e djeshme, ish-kreu i qeverisë italiane ka parë nga afër objektet më me vlerë të këtij qyteti. Rreth orës 11:00, ai është pritur nga pushtetarët lokalë, kryetari i Bashkisë, Fadil Nasufi, dhe prefekti Thoma Rumniçi në lagjen "Kala" ku ka vizituar muzen "Onufri" dhe disa nga objektet e kultit që ndodhen në këtë lagje. Ka qenë kryetari i Bashkisë, Nasufi, i cili i ka uruar mirëseardhjen ish-kreut të qeverisë italiane dhe ka ftuar Prodin dhe zonjën e tij që e shoqëronte për të vizituar pjesën më të rëndësishme të qytetit. Pasi ka vizituar muzeun "Onufri", Prodi është shprehur se ka ngelur i mrekulluar, duke e cilësuar atë si një vlerë që mbart një pjesë të shkëlqyer të historisë. "Në këtë vizitë të radhës në Shqipëri jam ndalur në Jugun e Shqipërisë, ndërkohë që në vizitën tjetër do të vizitoj Veriun e saj. Shikoj një qytet me trashëgimi të admirueshme fetare dhe dashuri njerëzore, një lagje muze ende të banuar dhe gjeta një muze që tregon vlerat e tij më të mira të historisë", u shpreh Prodi gjatë një prononcimi për median. Në lidhje me hyrjen ose jo te këtij qyteti ndër vlerat e njerëzimit, UNESCO, Prodi u shpreh se "nuk dua të bëj arbitrin në lidhje me këtë problem, pasi nuk më takon mua të them nëse Berati do të marrë aprovimin apo jo për të qenë në UNECSO, por unë shikojë një qytet me vlera të mëdha historike të cilat meritojnë të jetë ndër vlerat e njerëzimit ashtu siç meritojnë vlerat natyrore". Më pas, ish-kryeministri i Italisë është ndalur në brendësi të lagjes "Kala" ku ka vizituar disa nga objektet e shumta muzeale që ndodhen në të.

Berisha fton biznesin ndërkombëtar për investime

Personalitete të BE-së vlerësojnë reformat në Shqipëri

Presidenti i Fondacionit "Crans Montana Forum", Jean Paul Carteron, organizoi dje një drekë pune për nder të Kryeministrit të Shqipërisë, Sali Berisha, me pjesëmarrjen e përfaqësuesve të biznesit nga vende të ndryshme si SHBA, Franca, Austria, Monako, Jordania, Kuvajti, Emiratet e Bashkuara, Pakistani, Rumania, Bullgaria, Bosnje-Hercegovina, biznese kryesisht të përqëndruara në fushën e energjetikës, të infrastrukturës, të telekomunikacionit, të bujqësisë dhe ujit, të industrisë minerale, si dhe të industrisë financiare dhe fondeve të investimeve. Në fjalën e tij, kreu i qeverisë shqiptare përshëndeti pjesëmarrësit për interesimin e tyre për këtë takim dhe i ftoi ata të investojnë në Shqipëri, në fushat e mësipërme, duke i informuar se Shqipëria përfaqëson mundësi të mëdha në këtë drejtim. Gjithashtu, kryeministri i njohu pjesëmarrësit në Forumin e Crans Montana-s me përpjekjet e qeverisë shqiptare dhe angazhimin e saj për krijimin e një klime sa më të përshtatshme për biznesin. Berisha tha se investimi në Shqipëri është një histori suksesi jo vetëm për shkak të potencialeve të mëdha që ajo ofron, por edhe si pasojë e reformave të thella ekonomike dhe revolucionit në fushën fiskale, që e kanë kthyer Shqipërinë në një nga vendet me taksat më të ulta në Europë. Ndërkohë, në ditën e parë të punimeve të Forumit të Crans Montana-s, kreu i qeverisë shqiptare ishte i ftuari i nderit në një darkë në "Hotel de Paris" të Monte Carlos, të organizuar nga Carteron. Në këtë darkë të ftuar ishin edhe Zëvendëspresidenti dhe Komisioneri i Bashkimit Europian për Çështjet e Drejtësisë dhe Sigurisë, Jacques Barrot, Zëvendëspresidenti i Parë i Parlamentit Europian, Kratsa, dhe shumë personalitete të tjera. Nga ana e tyre, pjesëmarrësit në këtë darkë vlerësuan progresin që ka bërë Shqipëria gjatë viteve të fundit në luftën kundër krimit të organizuar dhe korrupsionit, si dhe në zbatimin e Marrëveshjes së Stabilizim-Asociimit me Bashkimin Europian. Gjithashtu, ata përgëzuan kryeministrin Berisha për marrjen e ftesës së anëtarësimit në NATO nga Shqipëria në Samitin e Bukureshtit, më 3 prill. Gjatë darkës, kryeministri Berisha bisedoi gjerësisht me Zëvendëspresidentin Barrot dhe të pranishmit e tjerë mbi reformat dhe progresin në Shqipëri, në kuadër të zbatimit të Marrëveshjes së Stabilizim-Asociimit. Kryeministri Berisha u ndal veçanërisht në reformat në fushën ekonomike dhe përpjekjet e qeverisë shqiptare për krijimin e një klime sa më të favorshme për biznesin.

Shqipëria, potenciale të mëdha për investitorët e huaj

"Shqipëria ofron potenciale të mëdha për investime në sektorë të ndryshëm si bankat, sigurimet dhe në pasuritë e paluajtshme". Kështu ka bërë të ditur kryeministri Berisha, i cili gjatë qëndrimit në Monte Karlo ku po zhvillon punimet Forumi i Crans Montana-s, zhvilloi një takim me ministren e Shtetit të Emirateve të Bashkuara, Reem Al-Hashimy. Gjatë këtij takimi, kryeministri Berisha i përcolli ministres Al-Hashimi falenderimet për ndihmën që Emiratet e Bashkuara i kanë dhënë Shqipërisë. Kryeministri e njohu ministren Al-Hashimi me klimën e favorshme për biznesin të krijuar në Shqipëri dhe e siguroi për mbështetjen e qeverisë ndaj investitorëve të Emirateve të Bashkuara për të investuar në vendin tonë. Gjithashtu, gjatë takimit, kryeministri Berisha i bëri një ftesë ministres Al-Hashimi dhe personaliteteve të tjera drejtuese të Emirateve të Bashkuara për të vizituar Shqipërinë.

Biznesi kuvajtian, i mirëpritur për investime në turizëm dhe transport

Kryeministri Berisha zhvilloi dje në Monte Karlo një takim me Presidenten e Shoqatës Ekonomike të Kuvajtit, Rola Dashti. Kryeministri Berisha falenderoi Qeverinë e Kuvajtit për ndihmën e dhënë Shqipërisë dhe ftoi biznesin kuvajtian të investojë në Shqipëri, në fushën e turizmit dhe transportit. Më tej, kryeministri i kërkoi presidentes Dashti inkurajimin e më shumë investitorëve të tjerë kuvajtianë për të investuar në Shqipëri. Kryeministri tha se Shqipëria ofron potenciale të mëdha për të investuar në fushën e infrastrukturës, të energjisë, të burimeve minerale, të turizmit, si dhe ofron një sistem fiskal nga më të ultit në rajon dhe më gjerë, si dhe një klimë të favorshme për zhvillimin e biznesit.

PD: Raporti i BB-së, tregues i qartë i arritjes së qeverisë në luftën kundër korrupsionit

Partia Demokratike përshëndeti dje raportin e Bankës Botërore mbi indikatorët botërorë të qeverisjes. Duke e vlerësuar raportin si tregues të qeverisjes së mirë në drejtim të zhvillimit dhe që shërben si monitorues për performancën e qeverisjes, zëdhënësi i partisë më të madhe në vend tha se indikatorët e qeverisjes së mirë, të cilët maten në këtë raport, përfshijnë lirinë e medias dhe përgjegjshmërinë, stabilititetin politik, efektivitetin e qeverisjes, cilësitë rregullatore, shtetin ligjor, dhe kontrollin e korrupsionit. Gjithashtu, vlerësohet se ky raport i Bankës Botërore tregon se qeverisja në Shqipëri ka patur rritje në secilin prej indikatorëve dhe është duke bërë progres të rëndësishëm sidomos në kontrollin e korrupsionit dhe në efektivitetin e qeverisjes. "Po të krahasohen vlerat e indikatorëve mes viteve, vihet re qartë trendi pozitiv i rritjes së tyre nga viti në vit, sidomos në krahasim me qeverisjen e mëparshme. Kështu, në krahasim me qeverisjen e vitit 2004 dhe 2005, rritja në këta indikatorë është deri në rendet +10", tha zëdhënësi i PD-së. Më tej, raporti thekson se ky është një tregues i qartë i punës së qeverisë dhe arritjeve të saj në përmbushjen e një sërë objektivave, duke përfshirë këtu edhe prioritetet si lufta ndaj korrupsionit, vendosja e shtetit ligjor dhe rritja e efikasitetit të qeverisë. "Raporti është një tregues i qartë se kjo qeveri është në shërbim të plotë të qytetarëve dhe të zhvillimit të vendit drejt standardeve perëndimore", nënvizoi më tej zëdhënësi i Partisë Demokratike.

                                                        2005                                  2007                          diferenca        

Efektiviteti i qeverisjes                        31.8                         43.1                         +11.3

Kontrolli i korrupsionit                        29.1                         36.7                         +7.6

Stabiliteti politik                                  28.4                          34.6                         +5.8

KE po përgatit axhendën për liberalizimin e vizave

Komisioni Europian dhe Parlamenti Europian kanë nisur një axhendë konkrete, sipas të cilës në fillim të vitit 2009 do të liberalizohen vizat për të gjithë shqiptarët. Këtë fakt e ka bërë të ditur deputeti i Partisë Demokratike, Ferdinand Xhaferri, i cili përmes një deklarate për shtyp ka theksuar se Delegacioni parlamentar për Europën Juglindore ka vlerësuar maksimalisht reformat e ndërmarra në Shqipëri në të gjitha fushat, veçanërisht në luftën kundër korrupsionit dhe krimit të organizuar. "Arritja më e madhe është që ka filluar të konkretizohet procesi i liberalizmit të vizave. Sikurse kohë më parë thuhej se anëtarësimi në NATO është diçka konkrete dhe vëshirë të theksohej dhe tani, konstatohet se si në Parlamentin Europian ashtu edhe në Komisionin Europian po përgatitet opinioni i përgjithshëm dhe është bërë një axhendë konkrete që në fillimin e vitit që vjen të liberalizohen vizat për të gjithë shqiptarët", ka bërë të ditur deputeti i mazhorancës. Sipas Xhaferrit, Delegacioni parlamentar për Europën Juglindore ka vlerësuar reformat ekonomike të Shqipërisë dhe angazhimin e saj në luftën kundër korrupsionit. "Qeveria shqiptare ka shënuar progres të theksuar në luftën kundër korrupsionit. Pra, ne ndryshuam formatin dhe treguam që ky vend mund ta luftojë korrupsionin dhe krimin e organizuar, dhe tani ka filluar të konstatohet realizimi i luftës që ka shpallur Shqipëria kundër këtyre fenomeneve", ka vijuar më tej Xhaferri, duke nënvizuar se është vlerësuar fakti se në Shqipëri ka një klimë shumë të mirë ekonomike, sikurse theksohet edhe angazhimi në respektimin e të Drejtave të Njeriut. Ajo që ka shumë vlerë të theksohet, tha më tej Xhaferri, është se kemi arritur të ndryshojmë imazhin e vendit, të përcjellim një Shqipëri ndryshe, një Shqipëri që ndërtohet, që është e gatshme të fillojë në vitin 2009 liberalizimin e vizave për të gjithë qytetarët shqiptarë.

Biberaj përzgjidhet nga KE për zbardhjen e krimeve komuniste në ish-republikat sovjetike

Këshilli i Europës (KE) zgjedh deputetin Aleksandër Biberaj për të zbardhur krimet e regjimit totalitar të Stalinit në Ukrainë dhe në ish-republikat e tjera të Bashkimit Sovjetik, gjatë viteve 1932-1933. Sipas një njoftimi për shtyp të zyrës së shtypit të deputetit Biberaj, bëhet e ditur se në këto vite, 1932-1933, regjimi i Stalinit aplikoi me dhunë politikat çnjerëzore të shpronësimeve dhe të kolektivizimeve masive, dhe vendi u përball me një terror politik të jashtëzakonshëm, që në histori njihet si terrori masiv i urisë, me pasojë vdekjen e miliona njerëzve në Ukrainë dhe në ish-republikat e tjera të Bashkimit Sovjetik. Komiteti Politik i KE-së vendosi bashkimin e këtyre kërkesave në një raport, titullin e të cilit do ta propozojë deputeti Biberaj dhe do ta miratojë mbledhja e radhës e këtij Komiteti, më 5 shtator 2008, në Paris. Rekomandimet përkatëse do t'i paraqiten më pas për debat dhe miratim Komitetit Politik dhe Asamblesë Parlamentare të KE-së. Kjo është hera e parë që një deputet i Parlamentit shqiptar zgjidhet si përfaqësues i KE-së për të përgatitur një raport, bashkë me rezolutën dhe rekomandimet përkatëse.