Deri në vitin 2013 parashikohet realizimi i disa objektivave në terma afatmesme dhe afatgjata

Qeveria italiane, 30 milionë euro për zhvillimin e ndërmarjeve të vogla e të mesme në Shqipëri

Në shtator, sektorit privat të SME-ve, do t'i shtohet dhe një fond i ri, një financim prej 30 milionë euro nga qeveria italiane, në kuadër të strategjisë së zhvillimit të SME-ve deri në vitin 2013, çka rrit mundësinë e mëtejshme të zhvillimit të tyre. Ndërmarrjet e vogla dhe të mesme (SME) vlerësohen si nxitëse të rritjes së nivelit të punësimit dhe indirekt, në uljen e nivelit të varfërisë. Nisur nga kjo shkallë rëndësie, SME-të janë përfshirë në një program zhvillimi të shpejtë 5-vjeçar të ministrisë së Ekonomisë, që synon rritjen e konkurrueshmërisë së SME-ve në vend dhe në tregjet rajonale. Deri në vitin 2013, parashikohen realizimi i disa objektivave në terma afatmesme dhe afatgjata, ku si ndër më kryesorët përmenden rritja e numrit të të punësuarve 5% në vit, rritja 15% e numrit të ndërmarrjeve në vit, rritja e kreditimit dhe e aftësisë mikrokredituese gjatë 4 viteve me 3-4 herë më shumë, si dhe ngushtimi i vazhdueshëm i sektorit informal. Në 2007 ministria e Ekonomisë, Tregtisë dhe Energjetikës ka nisur zbatimin e dy programeve të reja nxitëse, të garantimit të eksporteve dhe të konkurrueshmërisë, ndërsa do të nisë këtë vit dhe programi italian për SME-të. Përmes programeve, ministria e Ekonomisë ka planifikuar mbështetje për reduktimin e mëtejshëm të barrierave burokratike, mbështetje për kompanitë eksportuese me grante për rritjen e konkurrueshmërisë, për kolateral për kreditë bankare, etj. Kështu, programi për mbështetjen e rritjes së konkurrueshmërisë së kompanive eksportuese, po vijon edhe këtë vit, përmes një fondi buxhetor prej 25 milionë lekë. Krahas tij, një fond tjetër po përdoret për mbështetjen buxhetore për linjat e kreditimit të SME-ve. "Programi synon që të inkurajojë bizneset e vogla dhe të mesme si dhe mikrondërmarrjet drejt zhvillimit në kuadër të hapjes së tregjeve, si një sfidë reale që duhet të përballojnë ato vetë", është shprehur zëvendësministri i METE-s, Eno Bozdo. Avantazhet që afrojnë vetë SME-të, kundrejt bizneseve të mëdha, që mbeten ende numerikisht të vogla, detyruan ministrinë e Ekonomisë, që një vit më parë, të niste një program që synon zhvillim të shpejtë dhe të qëndrueshëm të tyre. Pozicioni i SME-ve brenda sektorit privat, i rreshton në pozicion primar në drejtim të një zhvillimi të qendrueshëm ekonomik. Ato zënë 99,5% të numrit të përgjithshëm të bizneseve ndërmarrje private aktive.

Kontributi i sektorit SME vlerësohet në rreth 66% në punësim

Kontributi i sektorit SME vlerësohet në rreth 64% në PBB dhe në rreth 66% në punësim. SME-të ndikojnë në përmirësimin dhe efikasitetin e tregjeve të brendshme, pasi përdorin më mirë burimet financiare dhe njerëzore, krahasuar me firmat e mëdha të bizneseve, por dhe nxisin dhe zhvillojnë konkurrueshmërinë mes sektorëve dhe tregjeve. Përgjatë viteve të fundit, rritja e SME-ve si sektor, ka pasur qëndrueshmëri, çka tregon se mbetet ndër më kryesorët në ekonominë shqiptare. Kështu gjatë vitit 2007, numri i bizneseve të reja u rrit me mbi 15.000 të tilla, ndërsa numri i përgjithshëm, në rreth 80 mijë. Sipas strukturës së punësimit, SME-të me 1-80 punonjës, zënë mbi 99 % të ndërmarrjeve aktive në Shqipëri. Numri i ndërmarrjeve me mbi 80 të punësuar arrin në rreth 500 kompani, ndërsa numri i kompanive me mbi 250 të punësuar, rreth 60.

Përfundon Ballkaniada e 12-të e Matematikës, një medalje Argjendi dhe katër Bronxi për nxënësit tanë

Fituesit e medaljeve

1. Tedi Aliaj Medalje Argjendi Fier

2. Sindi Shkodrani Medalje Bronxi Vlorë

3. Disel Spahia Medalje Bronxi Shkodër

4. Arbeg Gani Medalje Bronxi Elbasan

5. Arnold Spahiu Medalje Bronxi Tiranë

Në qytetin e Vlorës u zhvillua për herë të parë në vendin tonë Ballkaniada e 12-të Matematikës për nxënësit deri në moshën 15 vjec. Pjesmarrës në këtë eveniment, të parin në qytetin bregdetar, ishin 71 nxënës nga 12 shtete të Ballkanit, Shqipëria, Maqedonia, Greqia, Qipro, Rumania, Bullgaria, Serbia, Mali i Zi, Bosnjë-Hercegovina, Kroacia dhe Moldavia, si dhe një grup nga Kazakistani, i ftuar të jetë pjesëmarrës në këtë olimpiadë.Këtë vit nxënësit tanë patën rezultatet më të mira në këto 12 vjet dhe rrëmbyen 1 medalje argjendi dhe 4 medalje bronxi, duke lënë prapa nxënësit e Maqedonisë, Qipros, Malit të Zi dhe Bosnje Hercegovinës. Ndërsa si grup ekipi ynë i matematikës zuri vendin e gjashtë. I pranishëm në ceremoninë përmbyllëse të këtij aktiviteti, ishte edhe Ministri i Arsimit dhe Shkencës Genc Pollo, i cili përshëndeti pjesmarrësit dhe shpërndau disa dhurata simbolike nxënësve kampionë në matematikë.

"Ne jemi krenarë, u shpreh Ministri Pollo, -që olimpiada e matematikës u mbajt në Shqipëri. Ne jemi krenarë që olimpiada e matematikës ballkanike u mbajt në Vlorë dhe që të gjithë patën mundësi të tregojnë talentin e dhe punën e tyre. Jam i kënaqur, si Ministër i Arsimit dhe Shkencës së Shqipërisë të shikoj që Shqipëria që ka dalë në këtë ballkaniadë shumë më mirë sec ka dalë më përpara, është një shenjë e qartë progresi, por gjithsesi kjo është një garë dhe në garë ka gjithmonë nga ata që fitojnë dhe ata që humbasin, por miqësia dhe shpirti i garës ruhen kur janë në balancë njëra me tjetrën. Të tilla gara do të zhvillohen besoj në Ballkan përsëri në Shqipëri në të ardhmen e afërt dhe shpresoj që mikëpritja e siguruar nga vendasit do të jetë në mos kjo më e mirë."

Skuadrat e vendeve pjesëmarrëse ishin të përbërë nga 6 nxënës, të cilët janë përzgjedhur nga olimpiadat kombëtare respektive të matematikës.

Juria përbëhej nga udhëheqësit e nxënësve të vendeve anëtare dhe këtë vit u kryesua nga profesor Llukan Puka.